الام.. والحياة

المشهد الاول:

الام والده جديد ونفسها ابنها ينام عشان تقدر تنام شويه،بس لما بيطول في النوم بتبصله بحب وتقوله اصحى بقه وحشتني نفسي اقعد معاك، هو مبيردش،اصله نايم.

المشهد التاني:

الابن عنده 5سنين وجاري ورا ممته وهي بتتكلم في التليفون او قاعده عاللاب او واقفه في المطبخ وهو بيبصلها باشتياق وبيقولها يا ماما نفسي اقعد معاكي،هي مبتردش،اصلها مشغوله

المشهد الثالث:

الابن في اولى كليه وممته قاعده مستنياه يرجع من كليته واول ما رجع بصتله بحنان وقالتله:حبيبي تعالي نفسي اقعد معاك تعالى احكيلي عملت ايه انهرده،بس هو قالها معلش لازم انزل،اصله رايح يلعب كورة مع صحابه. المشهد الرابع: الام قاعده سهرانه والقلق واكلها وابنها مش بيرد على موبايله،واول ما جه بصتله بلهفه وقالتله حبيبي كنت واعدني هتيجي بدري انهرده تقعد معايا شويه وكمان عدم ردك عالموبايل قلقني،رد قالها اصلي هدير /خطيبته/كلمتني وقالتلي تعالى عملالك مفاجئه عالسريع فرحت لقيتها هي ومامتها عاملين تورته وحفله صغيرة بمناسبة ان خطوبتنا عدى عليها 3شهور،وعملت الموبيل سايلنت عشان بيدايقوا لما بيرن وبيحسوا اني مش مركز معاهم،قالتله طب تشرب معايا شاي؟مردش،اصله نعسان وعايز ينام

المشهد الخامس:
الام بتتصل بابنها عشان تقوله حبيبي عدي عليا انهرده عشان توديني لاختك،مردش،اصله مخرج عياله يفسحهم ومش فاضي.
المشهد السادس:
الابن عنده مشكله كبيرة ومش عارف يتصرف،محتاج يفضفض،محتاج حد يحضنه بحنان ويطبطب عليه ويطمنه،نادي على ممته،مردتش،اصلها خلاص ماتت.
حياتنا ايام بين اشخاص محتاجينلنا واحنا محتاجينلهم،ركز معاهم عشان لما في يوم يسيبوا الدنيا بتاعتنا يبقه ساعتها كفايه عليك الم الفراق،لكن صعب اوي يجتمع الم الفراق والم الحسرة على انك في يوم كنت سبب دمعه نزلت من عنيهم.