ماما..ليه بتحبي النوم

يالا ياحببتي معاد النوم
لا يا ماما مش عايزه انام دلوقت
ياحببتي مش كل يوم خناق وقت النوم
يا ماما عشان خاطري معنديش نوم
يابنتي الله يهديكي ادخلي نامي
بتبدا عنيها تدمع وصوتها اتخنق من العياط وهي بتقول : يا ماما نفسي افهم انتي ليه عايزانا ننام واحنا مش عايزين،ليه يا ماما بتحبي النوم؟!
ليه يا ماما بتحبي النوم..الجمله دي كانت كفيله انها تخلي الام تسرح وتفكر انا ليه بحب النوم..بتحبه عشان هو الحاجه الحلال الوحيده اللي بتخليها تغيب عن الوعي..وهي نايمه محدش هيطالبها بحاجه..كلهم نايمين فمش هتحس انها مقصره معاهم..مفيش حاجه هتدايقهاهتهرب من كل اللي مضايقها عشان تنام وتحلم.....مفيش قهر ولا اكتئاب..الاكتئاب اللي بيكون اول شعور بيبدا يحس بيه قلبها اول ما تفتح عنيها وتكتشف انها لسه على قيد الحياه..
يمامااااااااااا بقاااااااااا مش عايزين ننام،انطلقوا في بكاء جماعي اخرجها من شرودها
ليه يا ماما بتحبي النوم ؟
السؤال اتكرر تاني،والمره دي سرحت في اجابه تانيه..لما كله بينام بتبقه متطمنه ان مفيش تليفون هييجي يستفزها..مالناس نايمه..محدش ههيبعتلها رساله تحرقلها دمها...مش مطلوب منها دلوقت اي نقاش او حلول او تبريرات او هروب..الناس نايمه والامن مستتب..
عااااااااااااااااااااااا عاااااااااااااااا بالله عليكي يا امي هنلعب شويه وبعدين ننام
علا صوتهم مره تانيه..لأ تالته..وكل مره بترجع تسرح في اجابة السؤال..ليه يا ماما بتحبي النوم..
حست بوجع في قلبها وهي بتقول لبنتها: لما تكبري هقولك انا ليه بحب النوم
لا قوليلي دلوقت
ياحببتي انت لسه صغيره ومش هتفهمي كلامي
لأ هفهم
سرحت تاني وهي بتقول في نفسها عارفه يا حببتي انك ممكن تفهمي،بس مش عايزه اعقدك من الدنيا وتكبري شايله الهم زيي،كبرت وانا شايله همووووم ولحد دلوقت شايلاها

طب ليه مش بتردي انتي زعلتي مني انا وسوسو؟متزعليش احنا بنحبك يا امي
بصتلهم وقالت في نفسها مهو ده اللي مصبرني
يالا يا حبايبي عشان تناموا
راحوا اوضتهم واعتراضهم المرة دي صامت لكن نظراتهم نقلته واضح تماما للأم،الأم اللي غطتهم وباستهم وطلعت من اوضتهم عالمطبخ،عملت كوباية شاي كبييييرة،وراحت على اوضتها طلعت الشوكلاته اللي كانت مخبياها منهم،وفتحت اللاب توب بتاعها وبدات السهرة بتاعتها،سهرتها اللي بتستمر يوميا لحد صلاة الفجر،وبتنام بعدها ساعات قليله عشان تبدا يوم جديد..ومعافرة جديده
الله عالهدوء..الناس نايمه..كلهم نايمين..مش مطلوب مني اي حاجه دلوقت..هعيط براحتي من غير ما اخاف انهم يشوفوا دموعي او يسألوني مالك..
ماما انتي ليه بتحبي النوم؟
المره دي هيا اللي عنيها دمعت واتخنقت بالعياط وهي بتجاوب اخيرا عالسؤال..انا يا حببتي بحب وقت النوم عشان بعرف اختلي بنفسي من غير ضغوط..اما النوم نفسه..بقه ضيف زيارته عزيزه..عزيزه اوي
بقلم/ مروة لبيب